Abaday nabalaka sa kakulangon sa supply sa tambal

GUSTONG masiguro ni Konsehal Roger Abaday, chairman sa komite sa Senior Citizen nga adunay igong supply sa medisina ang syudad ilabi na kay nakitaan ang pasaka sa kaso sa Covid-19 tungod niining omicron variant.

Sa special report ni Abaday atol sa sesyon niadtong Lunes nga gidumala ni Bise Mayor Kikang Uy, gusto niyang makasiguro nga dili kulangon ang syudad sa supply sa medesina human namatikdan nga adunay pipila ka mga pharmacia ang gikulang sa

supply sa tambal sama sa paracetamol, biogesic, bioflu, tuseran ug dicolgen nga miresulta sa pagkataranta sa katawhan.

Dugang ni Abaday nga tuyo lamang niya nga matubag ug mapangandaman ang kabalaka sa katawhan human si DTI Sec. Ramon Lopez mikonpirmar niadtong milabay’ng semana nga aduna gyud pagkakulang sa supply apan hinoon gipasalig sa mga opisyal sa Department of Health (DOH) nga anaa na na karon ang maong mga tambal, sumpay ni Abaday.

Niini, si Bise Mayor Kikang mibutyag nga masulbad na kini nga problema sa kakulangon sa supply sa tambal human misaad ang UNILAB Corporation nga sa sunod semana mahidangat na sa syudad sa Cagayan de Oro ang mga medesina nga maoy gikinahanglan sa katawhan.