Abaday motuki sa reklamo sa senior citizen

Magtigom karong alas-9 sa buntag diha sa hawanan sa konseho ang komite sa senior citizen ni Konsehal Roger Abaday aron motuki sa mulo sa usa ka hamtong nga molopyo sa Upper Balulang.

Kini kalabot sa giingong paglapas sa usa ka food chain diha sa Masterson’s Avenue sa mandato sa RA 9994 kon Epanded Senior Citizens Act nga naghatag og pribilihiyo ug diskwento sa mga hamtong.

Matod pa nga ang maong establismento pakyas sa paghatag sa diskwento ngadto sa maong hamtong human kini mipalit og makaon.

Dugang niini, ang komite motuki usab sa hangyo ni Mayor Rolando “Klarex” Uy nga maghatag kaniya og katungod paglagda sa Memorandum of Agreement tali sa Bright Horizons Caregiver Training Hub and Technical School Inc. alang sa pagpalambo ug paghatag og dugang proteksyon sa mga hamtong.

Niini, si Abaday nagdapit nila ni City administrator Atty. Roy Hilario Raagas, City Legal Officer Atty. Kenneth Tamala, OSCA head of office Honorio Cervantes Ph.D, ug tigdumala sa JDL food chain corporation.