Abaday mitagad sa mulo sa Carmen mkt vendors

HUGOT ang paglaum ni Konsehal Roger Abaday nga masolosyonan ang reklamo ug hangyo sa mga magpapatigayon palibot sa merkado sa Carmen kalabot sa problema sa insaktong parking area.

Sa sesyon sa Konseho niadtong Lunes nga gidumala ni Bise Mayor Kikang Uy, si Abaday mibutyag sa problema sa mga mamaligyaay sa merkado ingon man sa mga nanag-iya og negosyo sa kapiot sa trapiko ug kakulangon sa parking area alang sa pagkarga ug diskarga sa mga baligya.

Matod pa nga bisan sa gamay nga oras nga pag-parking sa mga sakyanan aron pagkarga o’ diskarga sa mga baligya dakpon man sila sa mga kawani sa Roads and Traffic Administration (RTA).

Kinahanglan nga masuta kini nga taho kay dili usab maki-angayon sa mga negosyante kinsa usa sa mga nagdala og pundo sa panudlanan sa dakbayan ug angayang amomahon, sumpay sa konsehal.

Buot masayran ni Abaday kun gitun-an ba pag-ayo sa RTA ang mga gipatumang palisiya saw ala pa kini gi-implementar.

Ang taho ni Abaday giduso ni Bise Mayor Kikang Uy ngadto sa komite sa Roads and Traffic Management ni Konsehal Romeo Calizo alang sa pakisusi ug dugang pagtuon.