Abaday misuportang makansela unit awards sa wala maokupahing socialized housing units

NAHAUM sa panahon ang pagpanday sa ordinansa nga magtumbok sa mga kapasikaran sa pagkansela sa awards nga gihatag ngadto sa mga benepisyaryo ug ang makapuli niini.

Kini ang gipadayag ni Konsehal Roger Abaday sa sesyon sa Konseho niadtong Lunes nga gidumala ni Bise Mayor Kikang Uy human gipalabang sa unang pagbasa ang ordinansa.

Gipasabot ni Abaday nga adunay mga socialized housing units nga natukod dihas Barangay Mambuaya ingon man sa Pahiron ug Pamahiran, Pagatpat nga walay okupante ug nagpabiling wala maokupahan.

Gibutyag sa konsehal nga personal siyang mipahigayon og imbestigasyon ug nasuta nga lakip sa mga hinungdan nganong nagpabiling daghang bakante tungod kay substandard ang unit, daghan usab sa mga awardees ang gapamili duol sa syudad tungod kay didto ang ilang kapanginabuhian ug ang uban giingong nabagliya na.

Niini, dako ang pagtuo ni Abaday nga dako kaayo og ikatabang ang maong balaodnon aron mahatagan sa kahigayonan kadtong mga pamilya nga nangandoy nga makaangkon sa kaugalingong panimalay.