Abaday misugyot og omento sa suholan sa medical workers

Ang pagpatuman og omento sa suholan aron makadani og dugang medical workers maoy usa sa nakitang solosyon nga mapagaan ang pag-atiman sa mga pasyente dinha sa JR Borja General Hospital (JRBGH).

Kini ang opinyon ni Konsehal Roger Abaday sa special report ni Konsehal James Judith kalabot sa mga kakulangon sa pagpadagan sa JRBGH.

Sa sesyon sa konseho niadtong Lunes nga gidumala ni Bise Mayor Jocelyn Rodriguez si Abaday mipasabot nga nagkulang ang mga doktor sa city hospital tungod sa kagamay sa suholan ug gani ang ubang doktor gihimo na lang nga consultant.

Siya midugang nga dili malilong sa katawhan nga dako ang nahimong kausaban sa maong balay tambalanan ilabina ang pagpalambo ug pagtukod sa dugang mga gambalay ug facilidad.

Niini, gisugyot ni Abaday nga gahinan og igong pundo ang maong balay tambalanan kay adunay igong kapas sa panalapi ang syudad ug aron matubag ang panginahanglan lakip na ang akreditasyon nga mahimong Level-2 ang JRBGH. (MLRapanot/SP)