Abaday misugyot mapatuman sa hingpit DILG MC 2020-036

Si Konsehal Roger Abaday, chairman sa komite sa Senior Citizens, nangusog nga mahatagan sa importansya ang giluwatang DILG MC 2020-036 nga nagdili sa mga motorized tricycle, pedicabs pag-agi sa national hi-way.

Kini ang unod sa iyang special report atol sa sesyon sa konseho niadtong Lunes nga gidumala ni Bise Mayor Jocelyn “Bebot” Rodriguez.

Gipasabot ni Abaday nga adunay gahum ang usa ka LGU pag-regulate sa operasyon sa mga pedicabs o’ tricycle pinaagi sa paghimo og alternatibong tricycle route plan subay sa maong MC ug giya gikan sa Department of Transportation (DOTr).

Mahimong mag-establisar og routing plan aron mapagaan ang problema sa trapiko diha sa national highway, dugang sa konsehal.

Sa iyang pagpakisusi sa buhatan sa Roads and Traffic Administration adunay giluwatan nga EO 127 ang mayor nga nagmugna og task force apan wala napatuman human nasinati ang Covid -19.

Matod ni Abaday nga kasagaran sa mga barangay naghatag og permit sa pag-operate sa mga motorized trisikad ug bao-bao tungod sa kakulangon sa transportasyon sa ilang mga lugar ug kini ang giilang matang sa transportasyon sa mga barangay.

Naglaum si Abaday nga malantaw kini ug mahatagan ang mga drivers sa kapanginabuhian kay dako kaayo kini nga problema sa mga traffic enforcer sa implementasyon.

Ang taho ni Abaday giduso ni Bise Mayor Bebot Rodriguez ngadto sa komite sa public utilities, energy and transportation ni Konsehal Romeo Calizo alang sa dugang pagtuon ug rekomendasyon.