Abaday misugyot mapanumbalik pagsuot og helmet sa mga naka-motor

GISUGYOT ni Konsehal Roger Abaday, Chairman sa Komite sa Games and Amusement, nga panason ang ordinansa nga naghatag og katungod sa Mayor, Roads and Traffic Administration (RTA), Cagayan de Oro City Police Office (COCPO) ug ubang ahensya sa gobyerno nga nagtugot sa mga naka-motor nga dili na kinahanglan magsuot og helmet dinhi sa Poblacion ug pipila ka mga dapit sa syudad.

Kini ang unod sa special report ni Abaday atol sa sesyon niadtong Lunes nga gidumala ni Bise Mayot Bebot Rodriguez. Matod niya nga tumong sa pagsuot og helmet mao ang kapaseguroan sa mga motorcycle riders diin subay sa datus sa United Nations mokabat sa 1.3 milyones ang natala nga mga biktima sa disgrasya sa kadalanan sa tibouk kalibotan.

“Gani, dinhi sa syudad dul-an sa gatos ang mga motorcycle riders nga natalang nadisgrasya sa bulan sa Oktubre, ning tuig subay sa datus gikan sa City Disaster Risk Reduction and Management Department (CDRRMD),” sumpay ni Abaday.

Lakip sa iyang girekomendar mao ang ‘no helmet no travel policy’ kay dako kini og makatabang nga maproteksyonan sa mga motorista. Gikahingawa ni Abaday ang nahitabo sa iyang anak nga kun nakasuot pa kini sa helmet atol sa aksidente posibleng aduna pay kahigayonan nga mabuhi pa.

Dako iyang paglaum nga masabtan sa publiko ang iyang sugyot kay alang kini sa kapasegurohan sa mga riders.

Ang sugyot ni Abaday giduso ni Bise Mayor Bebot Rodriguez ngadto sa Komite sa Public Order and Safety ni Konsehal Romeo Calizo alang dugang pagtuon ug rekomendasyon.