Abaday misugyot maghatag Tax Amnesty sa mga negosyante

KUSGANONG gisugyot ni konsehal Roger Abaday, chairman sa komite sa Games and Amusement sa konseho ang pagpalabang sa ordinansa aron subling maghatag sa tax amnesty alang sa interest ug penalty sa mga delikwenteng real property owners dinhi sa dakbayan.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga ubos sa Republic Act- 12001 kun Real Property Evaluation and Reform Act, gihatagan sa katungod ang matag  local government unit (LGU) nga mahatagan sa kahigayonan ang mga tag-iya sa luna ug gambalay nga ilang mabayaran ang ilang obligasyon sa gobyerno pinaagi sa one-time payment o installment nga pamaagi aron madasig kini sa pagtuman sa gabayan sa goberno.

Pasabot sa konsehal nga ang paghatag ug tax amnesty usa ka balanse nga solusyon niadtong adunay mga penalties ug surcharges nga napasagdan sa dugay nga panahon.

Siya midugang nga ang pagkolekta sa buhis importante aron mapadayon ang mga maayong programa ug proyekto sa syudad.

Niini malaumon si Konsehal Abaday nga mahatagan kini sa igong pagtagad alang sa kaayuhan sa dakbayan.

Ang maong sugyot ni Abaday giduso ni Bise Mayor Bebot Rodriguez ngadto sa Komite sa Finance, Budget and Appropriation ni Konsehal Yan Lam Lim ug Komite sa Ways and Means ni Konsehal George Goking alang sa dugang pagtuon ug rekomendasyon.