Abaday misugyot iduso sa BFP problema sa Macabalan Fire Station
DILI angayan mo interbener tungod kay walay hurisdiksyon ang kagamhanang lokal nga mosanong sa giatubang nga problema sa Macabalan Fire Station kay wala magkulang ang gobyerno lokal sa pag-suporta ngadto kanila ug sa atong kapolisan.
Kini ang gipaambit nga reaksyon ni Konsehal Abaday sa gipadangat nga special report ni Konsehal James Judith sa sesyon niadtong Lunes nga gidumala ni Bise Mayor Bebot Rodriguez kabahin sa nasinati nga problema sa Macabalan Fire Station sa ilang procurement system alang sa pisa sa ilang fire truck hinungdan nga dili kini maka responde panahon sa sunog.
Sumala ni Abaday nga ang maong problema, internal sa maong opisina ug subay sa Republic Act 9514 ang buhatan sa Bureau of Fire Protection ug uban pang ahensya sa gobyerno national ubos kini sa supervision sa Department of the Interior and Local Government (DILG) ug dili angay nga manghilabot ang lokal nga gobyerno.
Nagtoo si Abaday nga adunay gigahin nga pundo ang maong ahensya alang niini nga katuyoan. Nunot niini gisugyot ni Konsehal Roger Abaday nga ang nasangpit nga problema maduso ngadto sa buhatan sa Bureau of Fire Protection alang sa tukmang aksyon.
Comments