Abaday misugyot ibalik pagpatuman ang anti-jay walking

GISUGYOT ni Konsehal Roger Abaday, Chairman sa Komite sa Games and Amusement, nga ibalik ang pagpatuman sa anti-jay walking ordinance sa syudad kay dako kini og ikatabang pagdisiplina sa katawhan sa paggamit sa mga pedestrian lanes sa kadalanan.

Kini ang gipaambit ni Konsehal Abaday agig reaksyon sa special report ni Konsehal Suzette Magtajas Daba atol sa sesyon niadtong Lunes nga gidumala ni Bise Mayor Bebot Rodriguez nga may kalabotan sa mga insidente sa kadalanan diin namatikdan nga adunay pipila ka mga driver nga dili mohunong sa pedestrian lanes.

Sumala ni Abaday nga usa sa mga hinungdan sa aksidente mao ang dili pagsubay sa mga pedestrian lanes nga diin diha unta ang insaktong agian sa katawhan apan subo kay adunay pipila ang dili motuman.

Niini kusganong giduso ni Abaday sa konseho nga ipatuman subli ang anti-jay walking sa syudad aron matuhop sa katawhan ang kabililhon sa paggamit sa pedestrian lane ug aron malikayan o maminosan ang disgrasya sa kadalanan.