Abaday mirekomendar sa special permit sa Indahag Square Garden

GIKONSIDERA sa komite sa games and amusement ni Konsehal Roger Abaday ang hangyo sa tigdumala sa Indahag Square Garden nga mahatagan og special permit alang sa ilang tulo ka adlaw nga sabong sa umaabot Septembre 26, 27, 28, ning tuig.

Kini nunot sa kasaulogan sa umaabot nga kapistahan sa patron sa barangay Indahag nga si Senior San Miguel.

Atol sa milabayng tigom sa komite subling nagpahinumdom si Abaday sa tigdumala sa hingpit ug makanunayon nga pagpatuman sulod sa bulangan sa mga gisitar nga minimum health protocol sa Inter Agency Task Force (IATF) ug buhatan sa Mayor panahon sa ilang operasyon.

Matod sa konsehal nga kini bisan taliwala nga anaa sa Low Risk Categeory ang syudad tungod sa padayong pag-ubos sa mga kaso sa Covid-19.

Malaumon si Konsehal Abaday nga dili mapakyas sa pagpatuman sa standard protocol ang bulangan kay dili magpanuko ang kagamhanang lokal pagkansela sa permit kun masuta nga aduna kiniy mahimong kalapasan.

Niini, girekomendar sa komite sa pagpasaka og resolosyon ngadto sa plenary alang sa maong katuyuan.