Abaday mipasusi sa loteng gihangyong malakip sa on-site relocation program

GITAHASAN ni Konsehal Roger Abaday ang opisina sa City Housing and Urban Development Department nga ipadayon ang negosasyon tali sa mga molopyo sa Zone-2 Cugman Riverside Neighborhood Association ug pamilyang Tamparong, tag-iya sa lote, sa panghinaot nga magka-uyon aron mapangitaan ug pundo alang sa maong katuyuan.

Sa tigom sa komite sa urban and rural poor and housing development sa milabayng semana nga gidumala ni Abaday, gibutyag ni Teotimo Magadan Jr, Zone 2 leader, nga kapin sa 40 ka tuig na nga nanimuyo sa dapit ang kapin sa 200 ka mga pamilya.

Gihangyo sa mga molopyo nga mapalit sa syudad pinaagi sa on-site relocation program tungod kay dool lang sa ilang panginabuhian ug tunghaan sa ilang mga anak sa sentrong bahin sa dakbayan.

Niini, giawhag ni Abaday mga molopyo nga makigtambayayong sa CHUDD aron mahisgutan ug maproceso ang mga gikinahanlang mga dokumento alang sa maong tinguha.