Abaday mipasusi sa giingong ilegal nga pagmina sa Brgy. Tumpagon

GUSTONG pa-imbistigahan ni Konsehal Roger Abaday, Chairman sa Komite sa Environment, ang giingong aktibidadis sa ilegal nga pagmina nga natigayon sa Barangay Tumpagon ning syudad nga makadaot sa atong kinaiyahan.

Kini ang unod sa special report sa konsehal  atol sa sesyon niadtong Lunes nga gidumala ni Bise Mayor Bebot Rodriguez.

Sumala sa konsehal nga nadawat niya ang taho gikan sa City Local Environment and Natural Resources Office kon CLENRO nga usa ka nagpakabanang molopyo sa dapit ang mihatag sa impormasyon kabahin sa maong operasyon sa ilegal nga pagmina nga gidumala  sa usa ka Chinese National.

Gidugang  ni Abaday nga gikadismaya  niya ang taho nga adunay pipila ka opisyal sa goberno ug sa barangay ang matud pa nagpaluyo sa maong ilegal nga kalihokan. Gani gihimo gilayon ang pakisusi sa dapit sa mga hingtungdan ahensya sa goberno ug nasuta nga adunay timailhan nga adunay natigayon nga ilegal nga pagmina sa maong barangay tungod adunay kinalotan sa yuta.

Gibutyag usab ni Konsehal Abaday nga si Kapitan Cecilio Dagsaan mitaho atol sa tigom sa iyang komite nga adunay ilang namatikdan nga duha ka mga backhoe nga posibleng maoy gagamiton sa pagpahigayon sa ilegal nga pagmina sa dapit.

Niini, ang konseho mimugna og Ad Hoc Committee nga panguluhan ni Konsehal Abaday aron moimbestiga sa maong taho ug alang sa tukmang aksyon ug rekomendasyon.