Abaday mipahinomdum sa mga establismento

Si Konsehal Roger Abaday, chairman sa komite sa senior citizens, subling nagpahinumdum sa tanang establismento sa syudad nga kanunay ipatuman ang mandato nga nalatid ubos sa probisyon sa RA 9994 o Expanded Senior Citizens Act of 2010 nga naghatag og benepisyo sa mga hamtong.

Kini ang panawagan sa konsehal human gituki ang reklamo sa usa ka hamtong sa wala paghatag og diskwento sa usa ka food chain. Magsilbi kining pasida-an sa tanan nga andam mohatag og aksyon ang komite niadtong malapason sa balaod ug dili magpanuko sa pagpahamtang sa tukmang aksyon ug rekomendasyon.

Hinuon, ang gireklamo nga kan-anan mibutyag nga naghatag sila sa diskwento ngadto sa mga hamtong apan niadtong panahon nasayop sa pagproseso sa bayad ang cashier. Niini, iyang giaangkon ang nahimong sayop og nangayo kini sa dispensa.

Niini, si Abaday misugyot nga ma-edukar ang tanang empleyado kabahin sa balaod aron mapatuman sa insakto ug usab dili maapektuhan ang reputasyon sa mga kompanya.

Ang komite mipasaka og resolosyon nga naghatag og pasida-an o’ pahimangnu sa gireklamong food chain nga ipahamtang ang tukmang multa o’ silot sa susamang kalapasan.