Abaday mikwesyon sa gipatumang traffic rule dihas coastal road

DAKO ang kalipay ni Konsehal Roger Abaday, chairman sa komite sa Senior Citizens, nga pormal nang naabrihan ug maagian na sa mga sakyanan ang Gusa-Agora-Puntod-Kauswagan diversion road.

Apan gusto niining masayran ang nagdumala sa plano sa trapiko kay ang 6-wheeler pataas nga mga sakyanan man lang ang gitugutan nga makaagi sa maong dalan.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Kikang Uy.

Sumala ni Abaday nga ang katuyuan sa paghimo sa maong diversion road aron makatabang nga mapagaan ang problema sa trapiko sa sentrong bahin sa syudad ug sa silingang lalawigan apan gikabisgo sa mga motorista kay gidid-an man kini nga makaagi.

Gani, gipangsikop naman hinuon sa mga kawani sa Roads and Traffic Administration (RTA) ang mga motorista nga moagi sa maong dalan.

Dugang pa sa konsehal nga ang pagpatuman sa plano makapahiubos sa mga motorista tungod kay wala may insaktong pagpahibalo o konsultasyon sa katawhan.

Buot masayran ni Abaday ang basihan nga naghatag og panugot sa mga kawani sa RTA nga mosikop sa mga motorista nga moagi sa nahisgotang diversion road.

Ang taho ni Abaday giduso ni Bise Mayor Kikang Uy ngadto sa komite sa Roads and Traffic Management ni Konsehal Romeo Calizo alang dugang pakisusi ug rekomendasyon.