Abaday mihangyo sa DWPH hatagan sa pagtagad ang mulo diha sa Marcos Bridge

GIHANGYO ni Konsehal Roger Abaday, Chairman sa Komite sa Games, ang Department of Public Works and Highways (DPWH) nga hatagan sa pagtagad  ang  portion sa Marcos Bridge nga giingong delikado  sa mga pedestrian panahon kon magbaha.

Sa tigom sa Komite sa Public Works sa miaging semana nga gidumala ni Konsehal Edgar Cabanlas,  gipaambit sa konsehal ang iyang namatik dan diha sa maong dapit kalabot sa gitrabahong  asphalt overlay nga giingong mitupong na sa gutter gawas pa nga natabonan usab ang mga outlet sa tubig  hinungdan  nga delikado kini sa katawhan nga mabolasot panahon kon magbaha.

Matod sa taga DPWH nga wala pa nakompleto ang proyekto ug nagpadayon sa kasamtangan ang pagtrabaho niini ug mipasalig nga ila kining atimanon inig makompleto ang maong proyekto.

Hinoon, nagpasalamat si Konsehal Abaday sa DPWH sa pag-update sa komite ug nanghinaot nga masolusyonan ang iyang gipaabot nga mulo sa labing dali nga panahon alang sa kaluwasan sa katawhan.