Abaday miduso sa hangyo sa MBN ngadto’s CLO

Pabor ang Komite sa Environment ni Konsehal Roger Abaday sa hangyo sa MBN Trading Corporation pagsagop og resolosyon nga magpadayag og pag-uyon sa gilarawng pagtukod og Crushing Plant Facility diha sa Zone 1, Pagatpat.

Kini human ang representante sa Environmental Management Bureau (EMB) sa Department of Environment and Natural Resources (DENR), sa tigom sa miaging semana, mitaho nga ang ilang buhatan nakahatag og Environmental Compliance Certificate ngadto sa kompanya. Dugang pa, ang Konseho sa Pagatpat misagop usab sa resolusyon nga nagpadayag sa pag-uyon sa maong operasyon.

Sa maong higayon, ang representante sa City Local Environment and Natural Resources (CLENRO) miingon nga moluwat sila og Social Acceptability Certificate kun masuta nga walay negatibong epekto sa kinaiyahan ang operasyon.

Niini, si Engr. Jer Aian Pascual, mining engineer sa MBN, mipasabot nga ang resolosyon gikan sa konseho usa sa mga rekisitos sa Mines and Geosciences Bureau (MGB) aron mahatag ang ilang mineral processing permit.

Ang aplikasyon sa MBN giduso ni Abaday ngadto sa City Legal Office (CLO) alang sa dugang pagtuon ug rekomendasyon.