Abaday midayeg sa sugyot pagtukod og waste mgmt system, processing facility project

GIDAYEG ni Konsehal Roger Abaday ang project proposal nga gipresentar sa Arn Central Development Corporation (ACDA) nga giulohan og “The Cagayan de Oro City Total Waste Management System and Processing Facility Project”.

Sa milabayng tigom sa komite sa environment, gipasabot sa representante sa kompanya nga kini usa ka Public-Private Partnership diin ang kagamhanan mao ang mogahin og luna aron tukuran sa maong fasilidad ug ang kompanya mao ang mobuhat sa desenyo, moabaga sa galastohon ug mopatuman sa proyekto dala ang pagseguro nga epektibo kining moproseso sa mga basura ingon man sa environmental management.

Gipasabot nga sa maong fasilidad makunhuran ang gidaghanon sa basura pinaagi sa epektibong processing treatment, diversion ug conversion gawas nga makahatag pa kini sa daghang trabaho sa katawhan sa syudad.

Gikonsidera sa kompanya nga maoy i-rehabilitar ang kasamtangang landfill ug giingong mahimo pa kini nga eco-tourism site.

Matod ni Abaday nga maayo kaayo ug dalaygon ang maong proyekto apan gikinahanglang matun-an pa kini ug kun mahimo aktwal gayud nga makita sa komite ang ilang fasilidad sa kauluhan aron matino ang ka epektibo niini ug kun giunsa pagpadagan.

Ang tigom sa komite sa environment gitambongan usab ni Konsehal Yvy Emano.