Abaday miawhag magamit na gambalay sa CCS

Dako ang kahingawa ni Konsehal Roger Abaday nga kapin na sa napulo ka tuig nga wala pa magamit ang nasunog nga gambalay sa City Central School (CCS).

Kini ang unod sa special report ni Abaday sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez.

Matod ni Abaday nga mokabat sa 52 ka mga lawak saringan ug multi-purpose building sa maong tunghaan ang wala mapusli hangtod sa kasamtangan taliwala nga panahon sa milabayng administrasyon ni kanhi Mayor Dongkoy Emano migahin ang syudad og P30 milyones alang sa pagtul-id sa maong nasunog nga edifisyo.

Apan wala hatagi og panugot nga ipagamit ang maong lawak saringan sa administrasyon ni kanhi Mayor Oscar Moreno tungod kay matod dili luwas alang sa kabataan ug mga magtutudlo ang maong gambalay, sumpay sa konsehal. Siya midugang nga mihimo usab sa pakisusi ang mga eksperto sa Department Public Works and Highway (DPWH) apan wala pay migawas nga resulta hangtod karon.

Dugang pas-onon nga gasto sa mga ginikanan sa panahon nga adunay mga dagkong kalihukan ang tunghaan sama sa graduation ceremony tungod kay mangita man og maabangan.

Niini, malaumon si Abaday nga sa kasamtangang administrasyon ni Mayor Klarex Uy mapangitaan sa tukmang solusyon tungod kay kulang gayud og mga lawak saringan sa tunghaan ug gani tunga sa adlaw nalang motungha ang mga tinun-an.

Ang panawagan ni Abaday giduso ni Bise Mayor Rodriguez ngadto sa komite sa edukasyon ni Konsehal Suzette Magtajas-Daba ug komite sa public works ni Konsehal John Michael Seno alang sa makuting pagtuon ug rekomendasyon.