Abaday miaksyon sa petisyon sa Higaonon MP Coop

DALING giaksyonan sa Komite sa Environment ni Konsehal Roger Abaday ang petisyon sa United Higaonon Multi-purpose Cooperative (UHMPC) nga madeklara ang usa ka parsela sa lote dihas Dansolihon nga “Minahang Bayan o’ People’s Small Scale Mining Area”.

Sa milabayng tigom sa komite, ang representate sa kooperatiba mipasabot nga kun kini madeklara alang sa pagmina mahimong legal ang small scale mining sa dapit ug mahatagan na sa igong kapanginabuhian ang mga molopyo.

Gani, ang Department of Environment and Natural Resources (DENR-10) mibutyag nga ang Minahang Bayan usa sa mga gihatagan sa prayoridad sa gobyerno aron maalibyohan ang kapobrehon ug usab daghan ang makabenepisyo.

Sa iyang bahin, si City Local Environment and Natural Resources Officer (CLENRO) Engr. Armen Cuenca mibutyag nga ubos sa Zoning Ordinance ang maong dapit gi-classify nga agricultural zone ug kun ipatuman ang hangyo angayang ma-amendar ang klasipikasyon sa lugar.

Niini, si Abaday nagdapit sa kadagkoan sa City Planning and Development Office (CPDO) ug uban pang ahensya sa gobyerno pagtambong sa sunod tigom aron matuki ang posibilidad pag-amendar sa Zoning Ordinance sa tinguha nga matabangan ang mga sakop sa kooperatiba.