ABADAY MIAKSYON SA HANGYO SA TAGA-KAUSWAGAN

DALING giaksyonan ni Konsehal Roger Abaday, chairman sa komite sa senior citizens, ang hangyo sa mga residente sa sitio Pasil, San Lucas, San Marcos sa Capisnon ug Gawad Kalinga sa barangay Kauswagan nga ma-atiman ang suga sa poste nga sa dugay nang panahon nga wala gyud naatiman.

Lakip sa gihatagan sa pagtagad ni Abaday mao ang hangyo sa mga molopyo sa Macanhan, barangay Carmen nga masugaan usab ang ilang kadalanan tungod kay bation nila ang kahadlok panahon sa kagabhi-on tungod sa kangitngit sa dapit.

Sumala ni Abaday nga gitubag ug gibuhat lang niya ang hangyo sa mga residente ug gituman ang tahas sa pagserbisyo sa katawhan isip usa ka piniling opisyal sa syudad.

Niini, malaumon si Abaday nga ang pagbutang og dugang suga sa poste makahatag sa gikinahanglang kahayag ug makapahupay sa kabalaka sa mga nanimuyo sa dapit panahon sa kagabhion.