Abaday gisugyot ang pagbutang ug CCTV sa mga kabarangayan

Gihingusgan ni konsehal Roger Abaday, chairman sa komite sa senior citizen, ang pagbutang sa Closed-Circuit Television kon CCTV sa mga kabarangayan sa syudad kay dako kini ug makatabang sa himoong imbestigasyon sa kapolisan sa gakahitabo nga

mga krimen sa syudad.

Kini ang unod sa special report ni Konehal Abaday sa sesyon ni-adtong lunes nga gidumala ni Konsehal Edna Dahino nunot sa nahitabong pagpamusil ni barangay kagawad Roland Sherwin Tawee Uy ug sa iyang sinaligan diha sa barangay Pagatpat ning syudad.

Sumala ni Abaday daghan pa sa mga kabarangayan sa dakbayan ang walay CCTV camera ug ang uban barangay nangaguba na ang ilang mga CCTV nga diin usa kini sa mahinungdanon kaayo aron makita ug ma-ila ang mga tawo nga mohimo ug krimen sa dapit.

Nunot niini nanawagan si Konsehal Abaday sa mga barangay opisyal nga kun mahimo ilakip nila sa ilang 2022 annual budget ang pagpalit sa CCTV camera sa katuyuan nga mamonitor kining mga daotang elemento sa palibot.

Ang maong sugyot ni Abaday giduso sa komite sa barangay affairs ni Konsehal Yan Lam Lim alang sa dugang pagtuon ug rekomendasyon.