Abaday gisigurong matuman ang rekisitos sa goberno bahin sa Buntod Cave

GUSTONG masiguro ni Konsehal Roger Abaday, chairman sa Komite sa Environment, nga ang pagpanday sa ordinansa aron madeklarar nga local conservation area ang Buntod Cave diha sa Barangay Dansolihon, makasubay sa balaod.

Buot masuta sa konsehal kon ang maong dapit gipanag-iyahan ba sa goberno, tungod kay ubos sa RA 9072, magkinahanglan pa sa panugot kun ang dapit iya sa pribadong indibidwal.

Kini ang gipaambit nga panahum ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez diin gituki ang Memorandum of Agreement (MOA) tali sa syudad ug Department of Environment and Natural Resources nga magtumbok sa Buntod Cave isip local conservation area.

Lakip sa gustong masuta ni Abaday kon unsa nga ahensya sa goberno ang magdumala sa Buntod Cave gumikan kay gihangyo usab niini ang pagahin og pundo alang sa pagpalambo sa maong dapit.

Malaumon si Abaday nga mahan-ay kini pag-ayo ug masunod ang tanang gikinahanglang rekisitos nga gisita sa goberno.

Nunot niini, giduso ni Bise Mayor Bebot Rodriguez ang maong MOA ngadto sa Komite sa Environment ni Konsehal Roger Abaday ug sa Komite sa Tourism ni Konsehal Jay Roa Pascual alang sa dugang pagtuon ug rekomendasyon.