Abaday gihingusgan magpadayon ang Operation Likay Baha

PADAYONG gihingusgan sa kagamhanang lokal nga magpadayon ang Operation Likay Baha nga ang katuyuan mao ang pag-agni sa katawhan nga manghinlo kanunay sa mga canal ug ilabay sa insaktong labayanan ang basura aron malikayan ang pagbaha.

Kini ang gibutyag ni Konsehal Abaday atol sa ilang senemanang  programa  sa  kahanginan  nga  ang Konseho Karon.

Sumala ni Abaday nga nagmalampuson ang unang hugna sa maong kalihukan nga gipahigayon sa Barangay Kauswagan, Bulua ug Barangay Patag diin gitambongan sa mga opisyal sa barangay, kapolisan, Bureau of Fire Protection, Department of Public Work and Highways, BJMP ug uban pang ahensya sa goberno lakip na ang nagkadaiyang civic group sa syudad.

Nanawagan ang konsehal sa katawhan nga mokooperar sa maong programa sa goberno  pinaagi  sa pagsunod sa insaktong oras ug adlaw sa paglabay sa mga basura ug dili angay nga magsalig pa sa goberno, sumpay ni Abaday.

Nasayran nga ang programa gidumala sa Komite sa Environment ni Konsehal Roger Abaday, Komite sa Public Works ni Konsehal Edgar Cabanlas ug Komite sa Barangay Affairs ni Konsehal Yan Lam Lim.