Abaday: Food market diha sa Rio Boulevard makapalambo sa turismo

DAKO ang pagtuo ni Konsehal Roger Abaday, Chairman sa Komite sa Games and Amusement, nga makatabang sa dakbayan ang ipahigayon nga night market tungod kay makapadani kini sa mga turista.

Ang pagbutang og food market diha sa Rio de Oro Boulevard usa sa mga programa sa Higalaay Festival 2024 alayon sa nagsingabot nga kapistahan sa syudad.

Kini ang reaksyon ni Konsehal Abaday sa special report ni Konsehal Romeo Calizo atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga human napasabot sa mga kawani sa City Tourism Office ug sa organizer ang katuyoan sa maong kalihokan, nasuta nga makahatag kini sa dugang atraksyon sa kapistahan ug makatabang sa pagpalambo sa atong turismo sa syudad.

Dugang pa niini nga kon napahibalo pa lang una  sa mga organizer ang katuyoan ayha ang pag-publikar niini diha sa social media, mahimo kining mapanalipdan ug mapasabot sa katawhan.

Nunot niini, suportado ni Konsehal Roger Abaday ang resolusyon nga nag-agni  subli sa mga magpapatigayon nga gustong mubobo sa ilang puhonan aron  mobutang og food market sa dapit isip kabahin sa kalihokan sa Higalaay Festival sa syudad.