Abaday admitado sa kakulangon sa teknolohiya pag-proseso sa basura

ADMITADO si Konsehal Roger Abaday, Chairman sa Komite sa Environment, nga kulang pa ang dakbayan sa teknolohiya nga magamit diha sa sanitary landfill aron sa pag-proseso sa mga basura.

Kini ang reaksyon ni Konsehal Abaday atol sa sesyon niadtong Lunes nga gidumala ni Presiding Officer Protempore Romeo Calizo sa special report ni Konsehal Bernie Esparcia mahitungod sa kakulangon sa mga barangay sa kagamitan sa ilang material recovery facility ingon man ang problema pagbaligya sa ilang abot nga abuno.

Sa maong higayon, gipasalamatan sa konsehal ang kabarangayan nga misunod sa pag-implementar sa ordinansa kalabot sa waste management program nga ‘No Segregation, No Collection Policy’ nga dako ug ikatabang sa pagproteher sa kinaiyahan.

Dugang pa niini, gipahibalo sa konsehal nga dili na mag-problema sa pagbaligya sa mga goma sa ligid kay adunay kompanya nga mopalit niini didto sa  Lanao area.

Niini, giaghat ni Konsehal Abaday ang mga kabarangayan sa syudad nga mohimo og mga stratehiya sa pagbaligya pinaagi sa pagkoordinar sa mga dagkong tindahan ingon man sa mga mag-uuma alang sa maong katuyoan.