AB sa Tignapoloan giaprobahan sa konseho

HINGPIT nang mapatuman ang dugang programa ug proyekto sa barangay Tignapoloan ning syudad.

Kini human ang konseho sa sesyon niadtong Lunes nga gidumala ni Bise Mayor Kikang Uy misagop og resolusyon nga nag-uli sa ordinansa barangay nga may kalabutan sa ilang Annual Budget nga adunay gibana-banang gahin ug galastohon balor P8, 914,100 alang sa hingpit nga implementasyon.

Lakip sa gipunduhan sa barangay ang pagrehabilitar sa sestima sa panubig sa Upper Tignapoloan, pagtukod og material recovery facility ug barangy reforestation project.

Gigahinan usab sa barangay og igong pundo ang youth development program alang sa Sangguniang Kabataan, npagpalit og mga supplies ingon man ekipo nga magamit panahon sa kalamidad ug daghan pang uban nga gilantawng maghatag kaarangan sa kinabuhi sa katawhan.

Matod ni Konsehal Yan Lam Lim, chairman sa komite sa barangay affairs mipasabot nga iyang gisuportahan ang maong lakang tungod dako kinig ikatabang alang sa kalambuan sa barangay.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Lim ug komite sa pamalaod ug reglamento ubos ni Konsehal Ian Mark Nacaya.