960 condo units pormal nga natunol sa benepisaryo - Cabanlas

MOKABAT sa 960 ka mga condominium units ang pormal nga natunol ngadto sa mga benepisaryo sa Balubal Heights Subdivision Federation, Incorporated diha sa Barangay Balubal niadtong milabay’ng semana.

Ang programa pahaum sa kalihokan gitambongan nila ni Mayor Klarex Uy, mga opisyal sa syudad, ug konseho sa Barangay Balubal.

Si Konsehal Edgar Cabanlas, Chairman sa Komite sa Urban and Rural Poor and Housing Development, mipaabot sa iyang dakong pasalamat ug kalipay sa tanang naningkamot aron ang maong proyekto sa kagamhanang lokal magmalampuson.

“Kini nagsugod sa pangandoy ug damgo ug karon aduna nay katumanan. Ang proyekto nagdala sa tema nga ‘Balay Mo, Kalipay Ko!’”, pamahayag ni Cabanlas.

Siya midugang nga ang proyekto nga medium-rise socialized housing ang labing una nga natukod sa syudad ug posibleng sa tibouk pulo sa Mindanao diin daghang mga kabus pa ang makaangkon og kaugalingong pinuy-anan.

Niini, si Cabanlas mibutyag nga gilaraw usab sa kagamhanan sa dakbayan ang pagtukod sa susamang proyekto diha sa Acasia St., Barangay Carmen. (MLRapanot/SP)