5 historical, cultural properties sa CDO gitumbok

LIMA ka mga historical ug cultural properties sa dakbayan sa Cagayan de Oro ang opisyal nga gitumbok ug giila sa Konseho sa syudad ubos ni Bise Mayor Bebot Rodriguez.

Kini, human ang konseho sa special session sa milabayng semana, hiniusang misagop sa Resolosyon No. 14631-2023. Ang maong mga historical ug cultural properties naglakip sa El Pueblo A Sus Heroes Monument, Gaston Park, Golden Friendship Park, Jose Rizal Monument, ug Cagayan Waterworks Tank.

Ang El Pueblo A Sus Heroes Monument, usa ka monumento ug mausoleum nga makita dinha sa Velez-Neri Streets. Kini natukod sa panahon ni Mayor Apolinar Velez niadtong tuig 1930, diin gipahimutang ang mga mga bukog sa mga Kagay-anong bayani nga nakigbisog atol sa Battle of Agusan Hill niadtong Mayo 14, 1900.

Ang Gaston Park unang namugna nga Fuerza sa panahon sa mga Kastila ug napaanyag sa panahon ni Gobernador Segundo Gaston niadtong tuig 1924. Sa kasamtangan, daghan nang kabag-ohan nga napatuman sa Gaston Park aron mamahimong suroyanan sa mga bisita ug mga Kagay-anon.

Samtang ang Plaza Divisoria usa ka luna sa yuta nga gidonar ni Mayor Tirso R. Neri sa tuig 1901-1904. Kini nagbahin sa amihanan ug habagatang bahin sa dakbayan ug nagamit nga lugar diin nagtapok ang katawhan sa pag-abot ni General Emilio Aguinaldo niadtong Oktubre 5, 1924.

Ang Jose Rizal Monument natukod niadtong tuig 1917 agig pahinungod sa nasudnong bayani ug gidonar nila ni Porferio Chaves ug Fausta V. de Chavez. Samtang ang Waterworks Tank namugna ug natukod sulod sa tulo ka tuig niadtong 1919-1922. Ang maong reservoir nag-supply sa gikinahanglang panubig niadtong panahon sa 3 mil ka katawhan sa Poblacion area sa dakbayan.

Ang resolosyon nga gisagop sa Konseho pinasubay sa rekisitos nga gisitar sa National Commission for Culture and the Arts (NCCA).