48 infra projects mapatuman sa CDO

KWARENTA’Y OTSO ka mga proyekto sa imprastraktura ang mapatuman dinhi sa dakbayan sa Cagayan de Oro.

Kini ang kasayuran nga nadawat sa buhatan ni Bise Mayor Kikang Uy gikan sa Cagayan de Oro 2nd District Engineering Office sa DPWH-10 agig paghatag og pahibalo sa kagamhanang lokal sa mga naaprobahang proyekto nga padayong gipatuman ug mapatuman pa sa dakbayan karong tuiga.

Lakip niini mao ang pag-aspalto sa Cugman By-Pass Road; pagpalig-on sa Umalag Bridge 1 ug Agusan Bridge 1 dinha sa Butuan City-Cagayan de Oro City - Iligan City Road; pagtukod og dalan sa barangay Bugo, Agusan, Indahag, Balubal, Tablon, FS Catanico ug Macasandig, ug pagtukod og multi-purpose building sa barangay Consolacion, Lapasan, Agusan, Barangay 1, Macabalan, Cugman ug dinha sa Capitol Compound.

Mapatuman usab ang proyekto pagtukod og drainage structure sa Butuan City- Cagayan de Oro City- Iligan City Road, barangay Cugman, Barangay 28 ug Consolacion, ug proyekto pagtukod og pathway dinha sa Barangay Macasandig, Balubal, Tablon, Camaman-an ug Indahag.

Niini, dako ang pasalamat ni Bise Mayor Kikang Uy sa walay puas nga pag-abag sa DPWH aron maangkon sa dakbayan ang dugang kaarangan ug kalamboan.