40 infra projects nakompleto pagtrabaho

MOKABAT sa 40 ka mga proyekto sa imprastraktura dinhi sa dakbayan sa Cagayan de Oro ang nakompleto na sa pagtrabaho.

Kini ang kasayuran nga nadawat sa buhatan ni Bise Mayor Kikang Uy gikan sa kadagkoan sa 2nd District Engineering Office sa DPWH-10.

Ang maong mga proyekto gisugdan pagpatuman sa milabayng tuig ubos sa regular and local infrastructure projects nga sa ahensya.

Lakip sa maong mga proyekto mao ang pag-aspalto sa dalan dinha sa Sayre Highway; pagsemento sa dalan dinha sa Indahag, Puerto, Bugo, Camama-an, Macasandig, Lapasan, Gusa ug Cugman; pagtukod sa flood control structure sa Alae River sa barangay Bugo, Agusan River dapit sa Agusan ug Cugman ug Umalag River sa Tablon, ug pagtukod og multi-purpose building dinha sa barangay Balubal, FS Catanico, Tablon, Macabalan, Gusa, Barangay 23, Puerto, Agusan, Bugo, Indahag, Lapasan, Macasandig ug Cugman.

Mapasalamaton si Bise Mayor Kikang Uy sa walay puas nga pag-abag sa DPWH sa lokal nga kagamhanan dinha sa pagpatuman sa mga proyekto nga gilantawng magdala og dugang kaarangan ug kalamboan sa kinabuhi sa matag Kagay-anon.