4 SK annual budgets giuyonan sa konseho

MAPATUMAN na sa mga opisyal sa Sangguniang Kabataan sa upat ka mga barangay sa syudad ang ilang mga programa ug proyekto nga gilantaw’ng maghatag og dugang kaarangan sa kinabuhi sa kabatan-onan.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa managlahing resolosyon nga nag-uli sa tagsa tagsa ka resolosyon sa Barangay 18, 31, Carmen ug Macasandig diin nasukip ang ilang Sangguniang Kabataan 2023 Annual Budget.

Ang maong tinuig nga budget naglangkob sa gibanabanang kinitaan ug galastohon balor P400,696.00 sa Barangay 18; P786,181.00 sa Barangay 31; P9,560,339.00 sa Barangay Carmen ug P6,574,585.00 sa Barangay Macasandig.

Ang maong mga pundo gamiton sa pagpatuman sa mga programa ug proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Lakip sa gipundohan sa budget mao ang mga programa pagpalambo ug paghatag sa gahum sa kabatan-onan (SK Youth Development and Empowerment Programs), pagproteher sa kinaiyahan, pagpalambo sa paugnat sa kusog, pagpamalit og mga laptop ug projector, kampanya kontra druga ug uban pa.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolusyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Ian Mark Nacaya.