3 Kagay-anong topnotchers sa Teacher’s Board gipahalipayan

HINIUSANG gipahalipayan sa konseho sa syudad atol sa sesyon kagahapon nga gidumala ni Bise Mayor Bebot Rodriguez ang tulo ka Kagay-anong topnotchers sa gipahigayong 2023 Licensure Exam for Professional Teachers (LEPT) niadtong March 19, 2023.

Kini naglakip nila ni Gee Mariel L. Gaputan, kinsa maoy 3rd placer; Hazel C. Cabutad, 6th placer, ug Queenie Love S. Pacto, 10th placer, tanan gradwado sa kursong Bachelor of Science in Secondary Education (BSED) sa Xavier University (XU).

Mahinumdoman nga ang konseho una nang misagop sa Resolosyon No. 14596-2023 ug nagpahalipay ni Cabutad sa naangkong kalamposan isip usa sa produkto sa City Scholarship Program sa dakbayan kun Iskolar ng Dakbayan (IsDa) nga migradwar nga Magna Cum Laude.

Nasayran nga sa 102,272 nga nagkuha sa pasulit mokabat sa 48,005 ang malamposong nakapasar sa maong Teacher’s Board. Tungod sa ilang dalaygon ug impresibong kalamposan sila nagdala og dungog ug garbo dili lamang sa ilang tunghaan, sa dakbayan sa Cagayan de Oro kun dili lakip na sa tibook nasud.

Ang maong resolosyon nga gipasaka alang sa maong katuyuan gipangamahan ni Bise Mayor Bebot Rodriguez kinsa malaumon nga ang naangkong kalampusan magdala og kaarangan sa kinabuhi sa mga bag-ong magtutudlo sa nasud.

Si Konsehal Suzette Magtajas-Daba, chairman sa Komite sa Edukasyon ug nagpaluyo sa gisagop nga resolosyon, mibutyag nga unta ang ilang kalamposan magdasig usab sa ubang mga tinun-an nga molampos gyud sa ilang gipili nga mga kurso. Ang resolosyon gipaluyohan usab sa Komite sa Pamalaod ni Konsehal Edgar Cabanlas.