3 infra projects sa CDO nakompleto na pagtrabaho

TULO ka proyekto sa imprastraktura dinhi sa dakbayan sa Cagayan de Oro ang nakompleto na sa pagtrabaho sa milabayng bulan sa Septembre.

Kini ang kasayuran nga nadawat sa konseho sa syudad nga gipanguluhan ni Bise Mayor Jocelyn Rodriguez human gisumete ni OIC-district engineer Ana Lee Manzano ang binulan nga accomplishment report sa Cagayan de Oro 1st Engineering District sa DPWH-10 ngadto sa komite sa public works ni Konsehal John Michael Seno.

Lakip sa nakompleto pagtrabaho mao ang proyekto pagtukod og multi-purpose building sa Lumbia Fire Station sa barangay Lumbia ug multi-purpose building sa barangay Tuburan ingon man ang proyekto nga asset preservation program construction/upgrading/ rehabilitation sa drainage dinha sa national roads – primary roads Butuan City- Cagayan de Oro City –Iligan City Road.

Ang maong mga proyekto gipundohan sa nasudnong kagamhanan ug gipatuman sa rehiyonal nga buhatan sa DPWH.

Ang pagsumete sa listahan sa mga nakompleto ug padayong gitrabaho nga mga proyekto nunot sa palisiya sa ahensya nga kolaborasyon tali sa lokal nga kagamhanan alang sa hingpit ug hapsay nga pagpatuman sa mga proyekto.