2023 SK budget sa Brgy 37 mapatuman na

Kapin sa 300 mil ang gigahin sa Sangguniang Kabataan (SK) sa Barangay 37 aron magamit pagpatuman sa mga programa nga nakahan-ay karong tuiga.

Kini human ang konseho sa syudad ubos ni Bise Mayor Bebot Rodriguez, sa sesyon niadtong Lunes, misagop sa resolusyon nga nag-uli sa resolusyon sa barangay diin nasukip ang 2023 SK Annual Budget nga adunay gibanabanang kinitaan ug galastohon balor P318,755.00.

Ang maong pundo gikuha gikan sa 10% Development Fund sa barangay subay sa probisyon sa RA 10742 kon Sangguniang Kabataan Reform Act of 2015 aron gamiton sa pagpatuman sa mga programa ug proyekto nga gihatagan og prayoridad alang sa dugang kaarangan kinabuhi sa kabatan-onan.

Gipundohan mao ang programa paghatag og dugang kahibalo sa kabatan-onan sa natad sa panglawas, kampanya kontra druga, pagproteher sa kinaiyahan, paugnat sa kusog, kalihokan pahaom sa kasaulogan sa Linggo ng Kabataan ug uban pang proyekto nga makapadasig kanila.

Si Konsehal John Michael Seno, chairman sa Komite sa Sports and Youth Development ug usa sa nagpaluyo sa gisagop nga resolusyon, mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa Komite sa Pamalaod ni Konsehal Edgar Cabanlas.