2023 annual budget sa Carmen SK uyonan sa konseho

Gipaabot uyonan sa konseho sa syudad sa sesyon karong hapon nga dumalahon ni Bise Mayor Bebot Rodriguez ang gidusong 2023 annual budget sa Sangguniang Kabataan sa Barangay Carmen nga mobalor og P9,560,339.00.

Ang maong pundo gilaraw nga magamit sa pagpatuman sa mga nahan-ay nga programa ug proyekto nga gilantawng maghatag og dugang kaarangan sa kinabuhi sa kabatan-onan sa ilang dapit.

Niini, balor P2,342,200.00 ang ilang gigahin alang sa Esterong Hero Clean and Green Program sa tinguha nga mapalapdan ang programa pagproteher sa kinaiyahan. Lakip sa gitagaan og prayoridad ang edukasyon ilabina ang paghatag og dugang kahibalo sa kabataan sa natad sa panglawas, pagpatuman sa kampanya kontra droga, youth employment and livelihood, gender

sensitivity, mga kalihokan pahaom sa kasaulogan sa Linggo ng Kabataan ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.

Ang sugyot resolosyon nga ipasaka sa konseho gipaluyohan sa komite sa sports and youth development ni Konsehal John Michael Seno ug komite sa pamalaod ni Konsehal Ian Mark Nacaya.