2022 budget sa SK sa brgy Macasandig mapatuman na

Kapin sa 2.9 milyones ang gigahin sa Sangguniang Kabataan (SK) sa barangay Macasandig aron magamit sa pagpatuman sa mga programa nga magpalambo ug maghatag sa dugang kaarangan sa kinabuhi sa kabatan-onan sa ilang dapit.

Kini human ang konseho sa syudad sa sesyon niadtong Lunes nga gidumala ni Konsehal Edgar Cabanlas, misagop sa resolosyon nga nag-uli sa resolosyon sa Macasandig diin nasukip ang ilang 2022 SK Annual Budget nga adunay gibanabanang kinitaan ug galastohon balor P2,902,437.00.

Gihatagan sa prioridad ang pagpalit sa mga gamit sa buhatan sa SK, pagpalit og lima ka unit nga laptop, usa ka unit scoreboard ug pagtukod og set sa basketball goal alang sa pagpalapad sa ilang programa sa paugnat sa kusog.

Dugang gipundohan mao ang programa nga maghatag og dugang kahibalo sa natad sa panglawas, kampanya kontra droga, pagproteher sa kinaiyahan, mga programa nga mag-umol sa capability building, gender sensitivity, youth employment and livelihood ug uban pang proyekto nga makapadasig kanila sa pagkab-ot sa dugang kaarangan ug kalamboan sa ilang kinabuhi.

Ang resolosyon nga gisagop sa konseho alang sa maong katuyoan gipaluyohan sa komite sa Sports and Youth Development ni Konsehal John Michael Seno ug komite sa pamalaod ni Konsehal Ian Mark Nacaya.