2022 budget sa Brgy. 29 SK giaprobahan sa Konseho

Mapatuman na sa hingpit sa Sangguniang Kabataan sa Barangay 29 ang ilang programa ug proyekto alang karong tuiga.

Kini human ang konseho sa syudad ubos ni Bise Mayor Bebot Rodriguez sa sesyon niadtong Lunes misagop og resolosyon nga nag-uli sa resolosyon sa Barangay 29 diin nasukip ang ilang 2022 SK Annual Budget nga adunay gibanabanang kinitaan ug galastohon balor P432,883.00.

Tipik sa gipundohan sa Barangay 29 SK mao ang kampanya kontra droga sa ilang dapit.

Migahin usab kini og igong pundo alang sa pagproteher sa kinaiyahan, mga programa nga mag-umol sa capability building, youth employment and livelihood ug uban pang proyekto nga gilantaw’ng makapadasig kanila sa pagkab-ot sa dugang kaarangan ug kalamboan sa sector sa kabataan.

Ang resolosyon nga gisagop sa konseho alang sa maong katuyoan gipaluyohan sa komite sa Sports and Youth Development ni Konsehal John Michael Seno ug komite sa pamalaod ni Konsehal Ian Mark Nacaya.