Hangyo sa hamtong, kabatan-onan alang sa libreng postiso gisuportahan ni Nacaya

Nangindahay ang mga batan-on ug mga hamtong sa dakbayan nga makabaton og postiso.

Kini ang unod sa special report ni konsehal Ian Mark Nacaya sa sesyon sa konseho niadtong Lunes nga gidumala ni bise mayor Kikang Uy.

Matod ni Nacaya nga daghang mga kabatan-onan ug hamtong ang mipadayag sa ilang kasinatiang kaulaw sa dihang mopahiyom tungod kay wala na silay mga ngipon.

Giingon nga hangtod karon wala kini matutuki ug masolusyoni sa mga hintungdang ahensya o maskin sa tibook nasud nga anaa kini nga suliran ug gani ilang gihangyo ang kagamhanan nga makahatag og 1 dental set para ipuli sa nangawala na nilang ngipon.

Hinoon gipasabot ni konsehal Nacaya nga adunay mga programa ang Department of Education (DepEd) og Department of Health (DoH) kung unsaon nga mamintinar ang kalig-on sa ngipon apan wala kini hingpit nga maimposar.

Matod sa konsehal nga angayan gayud nga tabangan sila nga makabaton og postiso aron nindot silang tan-awon diha sa ilang pagpahiyom atubangan sa katilingban.

Niini siya mihangyo nga matotokan kini nga problema aron matabangan kadtong dili makagahom sa pagpataod sa postiso ug nanghinaot nga sugdan sa 2 ka ahensya ang pagsulbad sa dental health problem sa nasod.

Ang maong taho giduso ni Bise Mayor Kikang Uy ngadto sa komite sa panglawas ubos ni Konsehal Malou S. Gaane alang sa dugang pagtoon ug rekomendasyon. (SP/Thurax)