Goking mihangyo maimbestigar investment scams sa dakbayan

Ang komite sa trade and commerce ni konsehal George Goking mipasaka og Resolosyon No. 001-2019 nga hugot nga mihangyo ni presidente Rodrigo Duterte nga masuta ang giingong investment scams dinhi sa dakbayan sa Cagayan De Oro ug probinsya sa Misamis Oriental nga naggamit sa ngalan sa presidente ug ni SAP Christopher “Bong” Go aron pagdani sa ilang mga biktima.

Kini human ang komite nakadawat sa daghang reklamo gikan sa mga biktima sa giingong investment scams dinhi sa syudad ug sa probinsya nga nagdala sa ngalan sa presidente ug ni Bong Go.

Ang maong investment scams padayon nga nangbiktima sa mga inosente nga mga sibilyan busa ang komite mihangyo nga matabangan sa buhatan sa presidente aron masikop ang mga kriminal ug maundang ang mga hiwing binuhatan ilabina nga bisan mga minor de edad nahimong mga biktima. (SP/APD)