Mulo sa taga-Patag giaksyonan

Ang Komite sa Urban Poor ni konsehal Zaldy Ocon ug komite sa police, fire and public safety ni konsehal Romeo Calizo mipadangat sa ilang hangyo ngadto sa opisina ni Presidente Rodrigo Duterte nga mapangitaan og pamaagi ang kahimtang sa mga residente nga anaa nanimuyo sulod sa 4ID Camp Evangelista, Patag, ning syudad.

Sa hiniusang tigom sa duha ka komite sa milabayng semana, gibutyag ni Ocon nga dili pa makalihok ang komite aron sa pagpangita sa alibyo ug mga pamaagi aron matubag ang maong problema tungod kay nag apela pa sa motion for reconsideration ang mga molopyo sa dapit ngadto sa opisina sa Housing and Urban Development Coordinating Council (HUDCC).

Niini, sumala ni Ocon nga hulatan unta ang ipakanaog nga hukom sa gihimong apela apan gipasalig nga moduso usab og hangyo ngadto sa presidente sa nasud.

Mahinumduman nga aduna nay hukom sa Lot No. 4138, 4353-A ug 4359-B. Nunot niini, nanghinaot ang konsehal sa pabiling pagsinabtanay ug ang maayong relasyon tali sa kasundaluhan ug mga residente sa dapit. (SP/El Kapitan)