Goking mipadayag suporta sa BFP

Si Konsehal George Goking, chairman sa komite sa ways & means, namahayag nga andam siyang mosuporta ug mangita sa pamaagi nga matunol ang hangyo sa kadagkoan sa Bureau of Fire Protection (BFP) atol sa paglusad sa Oplan Ligtas Na Pamayanan (OLP) dinhi sa dakbayan.

Ang kalihokan gisugdan pinaagi sa parada gikan diha sa Paseo del Rio, Rotunda niadtong Biernes, Abril 12, 2019 ug usa ka programa pahaum sa kalihokan ang gipahigayon dinha sa Barangay 40 Covered Court.

Ang kadagkoan sa BFP mibutyag nga nagkinahanglan sila sa dugang mga kahimanan sama sa Firetrucks ug uban pa sa tinguha nga matunol ang hingpit nga serbisyo ngadto sa katawhan ilabina panahon sa kalamidad sama sa sunog nga dali kini nga marespondihan.

Si Goking mipasabot nga andam siyang mosuporta sa maong mga panginahanglanon sa buhatan tungod kay kini gikinahanglan aron maprotektahan ang katawhan ug kabtangan nga maigo sa sunog.

Ang okasyon gitambongan sa kadagkoan sa syudad diin si konsehal Alam Lim, isip presidente sa Liga ng mga Barangay ang midawat sa gisagop nga proyektong OLP. (SP/APD)