Waste water disposal sa dakong kompanya sa Cugman gireklamo

USA KA DAKONG kompanya dinha sa barangay Cugman ang gireklamo sa mga silingan tungod sa giingong baho gikan sa ilang waste water disposal facility.

Mao kini ang gitaho ni konsehal Eric Salcedo, chairman sa komite sa cooperative, sa sesyon sa konseho niadtong Lunes nga gidumala ni bise mayor Kikang Uy.

Matod sa konsehal nga nabalaka ang mga molopyo duol sa maong kompanya ilabina ang mga residente sa Zone 2 Talidhay, Cugman nga makaapekto sa ilang panglawas ang pagpasagad sa kompanya sa ilang basura.

Taliwala nga adunay balaod nga nagmando alang sa pagbahin bahin sa mga basura gawas pa sa mga balaod nga naglatid pagproteher sa kinaiyahan, wala magpakabana ang kompanya sa pagtamod niini, dugang ni Salcedo.

Siya namahayag nga kapila na kahigayon nga gipatawag ang maong kompanya sa barangay apan wala gihapon masulbad ang nasinating problema,

Gani, ako mismo mibisita sa dapit ug natino nga tinood ang reklamo sa mga residente, sumpay sa konsehal.

Kinahanglan nga responsable kitang tanan sa paglabay sa atong mga basura labina sa mga dagkong kompanya aron makatabang sa komunidad nga makab-ot ang limpyo nga palibot aron walay maperhuwisyo gikan sa ilang operasyon, pasabot ni Salcedo.

Ang taho ni Salcedo giduso ni bise mayor Kikang Uy ngadto sa komite sa environment and natural resources ni konsehal Zaldy Ocon ug komite sa panglawas ni konsehal Malou Gaane alang sa dugang pagtuon ug rekomendasyon. (SP/Yonggals)