Pagpagamit sa lote sa syudad alang sa PCG Station tun-an sa konseho

GILANTANWNG MAKABATON NA sa loteng tukuran sa ilang Misamis Oriental Station ang Philippine Coast Guard (PCG).

Kini human ang konseho sa syudad ubos ni bise mayor Kikang Uy nagtuon sa hangyo ni mayor Oscar Moreno nga mopalabang og balaodnon nga maghatag kaniya og katungod nga mopirma sa Deed of Usufruct (DoU) tali sa dakbayan sa Cagayan de Oro ug PCG alang sa paggamit sa loteng gipanag-iyahan sa kagamhanan sa dakbayan dinha sa barangay Macabalan.

Ubos sa maong DoU, ang PCG mogamit sa maong lote nga adunay gilapdon nga 563 metros kwadrado sulod sa 25 ka tuig.

Ang lote tukoran sa PCG sa ilang opisina ug uban pang fasilidad nga gikinahanglan alang sa ilang operasyon ug magsilbi usab nga depository area sa sea ug port assets lakip na ang pagdumala ug operasyon sa kasamtangang lighthouse tower.

Gipasabot nga ang maong DoU magpakita sa tumong sa lokal nga kagamhanan nga moabag sa nasudnong gobyerno pinaagi sa PCG, sa tinguha nga mahatagan sa kapaseguroan ang mga merchant vessels ug mga pasahero niini, ubang mga seafarers ug seguridad usab sa shoreline sa syudad. (SP)