CdeO nangandam matubag epekto sa hulaw

Andam kanunay sa pagtubag sa panginahanglan kun ugaling grabeng maapektohan ang dakbayan sa Cagayan de Oro sa hulaw dala sa El Niño Phenomenon.

Kini ang gikasiguro ni konsehal Teodulfo Lao Jr., chairman sa komite sa energy, human nagpadayag sa ilang mga taho ang nagkadaiyang opisina sa City Hall atol sa milabayng tigom sa komite.

Matod ni Lao nga nahikay na ang contingency plan sa syudad sama sa pagtunol og pagkaon niadtong mga maapektohan sa kalamidad diin ang City Social Welfare and Development (CSWD) adunay kapas nga makapakaon sa P5 mil ka molopyo sa dakbayan sulod sa usa ka bulan.

Dugang pa, ang Agricultural Productivity Office (APO) mihan-ay na usab sa ilang programa sa irigasyon ug mga binhi ug semilya nga maoy hulip sa mga maapektohang pananum.

Andam na usab City Health Department sa mga medisina ug tambal nga gikinahanglan pagtubag sa mga motakboy nga sakit dala sa sobrang kainit.

Niini, si Lao malaumon nga mapadali sa City Risk Reduction Management Office (CDRRMO) ang pagpalit og water tanks tungod kay importante kaayo kini nga makatubag sa pagsupply sa tubig ilabina sa panahon sa hulaw. (SP/El Kapitan)