CdeO giila sa Philhealth pagsuporta sa NHIP

Usa ang dakbayan sa Cagayan de Oro nga giila sa Philippine Health Insurance Corporation (PHIC) sa kusganong pagsuporta sa National Health Insurance Program (NHIP).

Mao kini ang gibutyag ni konsehal Malou Gaane, chairman sa komite sa panglawas atol sa flag raising ceremony sa City Hall niadtong Lunes.

Matod niya nga kini gumikan sa paningkamot ni Mayor Oscar Moreno uban sa konseho sa syudad ni bise Mayor kikang Uy nga mahatagan sa patas nga kahigayonan ang katawhan sa natad sa panglawas.

Ang dakbayan midawat sa pasidungog gikan sa head office sa Philhealth didto sa kaulohan tungod sa makanunayong pagsuporta sa NHIP. Ang dakbayan mao usab ang adunay labing daghang enrollees sa programa nga walay amoroso ug insaktong nagbayad sa premium gikan sa tuig 2016 hangtog sa milabayng tuig 2018 ubos sa Sponsored Program.

Tungod niini, giila ang Cagayan de Oro nga adunay labing daghang pamilyang kabus nga nakapahimulos sa maong programa. Usa kini sa labing importanteng programa sa gobyerno nga gitagaan og dakong bili nga ang makabenipisyo ang kinabag-ang kabus sa dakbayan.

Si Gaane, chairman sa komite sa panglawas, mibutyag nga ang konseho ubos ni bise mayor Kikang Uy migahin og P180 milyones alang sa Philhealth Indigency Program Premium karong tuiga aron padayong makabenepisyo ang 75 mil ka pamilyang kabus.

Malaumon si Gaane nga pinaagi sa programa sa dakbayan daghan ang mahatagan og kahigayonan pag-adto sa hospital magpatambal sa ilang mga sakit ilabina ang mga walay kapas magbayad nga mga kabus nga pasyente. (SP)