Pagpatuman sa ecological services fee sa water users padayong tun-an

Padayong gitun-an sa komite sa planning and development ni konsehal Ian Mark Nacaya ug komite sa panalapi ni konsehal Edna Dahino ang lakang pagpahamtang og Ecological Services Fee ngadto sa tanang mogamit og tubig.

Kini human gituki atol sa milabayng tigom sa komite ang gisugyot nga balaodnon nga nagtumong sa pagproteher sa kinaiyahan ilabina ang kasubaan nga maoy tinubdan sa tubig nga moabot sa mga establisamento ug kabalayan.

Lakip sa gitumbok nga maprotektahan mao ang Cagayan de Oro River basin ug ang unom ka water shed areas sa syudad ilabina ang kalasangan pinaagi sa tukmang pagmintinar, pagtunol og insentibo ngadto sa mga forest guards ug susamang mga kawani nga nalambigit sa pagproteher ug rehabilitasyon sa kalasangan.

Ang makuhang pundo gikan niini, gilantaw usab nga gamiton alang sa pagpatuman sa mga livelihood programs ug uban pang mga proyekto nga mag-abag sa pagproteher sa Cagayan de Oro River Basin ug sa mga watershed.

Sa sugyot ordinansa, adunay ipahamtang nga 50 centavos matag cubic meter sa tanang residential consumers sa Cagayan de Oro Water District samtang P1 matag cubic meter alang sa mga commercial establishments.

Hinuon, si konsehal Edna Dahino misugyot nga kunhuran ngadti sa 25 centavos lang matag cubic meter ang ipahamtang ngadto sa tanang residential conumers ug 50 centavos sa mga commercial establishments.

Ang tigom sa komite gitambongan usab ni konsehal Malou Gaane uban sa mga kapunungang nagpakabana alang sa proteksyon sa kinaiyahan.