Gan miawhag dili malangan pagtunol sa social pension sa mga hamtong

Dako ang kalipay ni konsehal Leon Gan, chairman sa komite sa senior citizens, sa nadawat nga taho nga laing hugna na usab sa pagpanghatag sa social pension alang sa mga hamtong ang ipahigayon.

Matud ni Gan nga karong bulana ang gikatakdang pag-apod apod sa DSWD alang sa tanan nga mga benepisaryo ug lakip niini nga itunol ang Pantawid Pamilya Program sa gobyerno.

Niini, gikalipay sa konsehal ang nasangpit nga taho tungod kay makatabang man kini sa mga hamtong ilabina dinha sa pagpalit sa ilang mga panginahanglan.

Mao gayud na ang kanunay nga akong gihangyo ug gipanawagan sa buhatan sa City Social Welfare and Development (CSWD) nga unta dili madelatar ang pagpanghatag sa social pension sa mga hamtong aron magamit intawon nila pagpamalit sa ilang mga tambal ug medisina, pamahayag ni Gan.

Dugang niya, siya miingon nga taliwala sa mga ginagmay nga ayuda dako na kini nga tabang kanila ilabina nga sagad kanila mga kabus.

Nunot niini, naglaum si Gan nga sa dili pa matapos ang bulan sa Abril madawat na sa mga hamtong ang ilang social pension. (El Kapitan)