Pagbukas sa bag-ong pantalan sa Opol, Mis.Or gikalipay ni Goking

Dako ang kalipay ni konsehal George Goking, chairman sa komite sa trade and commerce, sa pormal nga pagbukas sa bag-ong pantalan dinha sa munisipyo sa Opol, Misamis Oriental.

Matud ni Goking nga dako ang posibilidad nga daghang mga magpapatigayon ang gustong mobobo sa ilang puhunan dinhi sa Cagayan de Oro tungod kay duol lang ang atong syudad sa maong pantalan.

Nakita usab sa konsehal ang posibleng pagdagsang sa mga turista, langyaw man o’ lokal tungod kay daghang shopping malls ang nahimutang sa syudad nga kasikbit lang sa Opol.

Nagtuo si Goking nga tungod niini nga kalambuan daghan sa katawhan sa dakbayan ang maka-benepisyo sa panarbaho kay madani man ang mga negosyante sa pagbutang og negosyo sa syudad.

Lakip sa nakita ni Goking ang paglambo sa kinitaan sa atong mga negosyante diin maapil usab ang panudlanan sa atong dakbayan mausbawan.

Nunot niini, ang konsehal nanawagan sa kwerpo sa kapolisan ug militar nga sa kanunay ipadayon ang pagbantay ug pagmintinar sa kahusay ug kalinaw sa dakbayan aron maagni ang mga negosyante nga mobobo sa ilang patigayon. (El Kapitan)