Ocon motuon sa hangyo sa taga-Acasia, Carmen

Konsiderahon sa komite sa public works ni konsehal Zaldy Ocon ang sulat sa mga residente sa Acasia, barangay Carmen kalabot sa ilang problema sa dalan.

Sa sulat ngadto sa komite ni Ocon, ang mga residente sa dapit mihangyo nga kun mahimo matugutan sila nga makaagi sa pribadong dalan nga gipanag-iya ni Leberato Delos Reyes.

Matod pa nga mao kini nga dalan ang mahino nilang maagian sa panahon nga adunay emerhensya sa ilang dapit sama sa baha, sunog ug uban pang kalamidad nga maghatag og kakuyaw sa ilang kinabuhi.

Niini, sila kinasingkasing nga mihangyo sa komite ni Ocon nga matugutang makaagi sa maong dalan dala ang panghinaut nga mahatagan kini sa igong pagtagad alang sa kaayuhan sa tanang residente labina usab sa ilang mga kabataan. (Yonggals)